ओस्लो, नर्वे । नर्वेको ओस्लोस्थित Veitvetveien 08 मा ध्यान, भजनकीर्तन तथा प्रसाद ग्रहण कार्यक्रम सम्पन्न भएको छ। MaNa Mangfold Nepal Norge को आयोजनामा सम्पन्न कार्यक्रममा नेपाली समुदायका परिवार तथा बालबालिकाको सहभागिता रहेको थियो।
‘Oslo Bhajan Kirtan with Family and Children’ नाम दिइएको कार्यक्रमको सुरुवात ध्यान (मेडिटेसन) बाट गरिएको थियो। ध्यान सत्रले सहभागीहरूलाई मानसिक शान्ति र आध्यात्मिक अनुभूति प्रदान गरेको थियो।
ध्यान सत्रपछि स्थानीय कलाकारहरूको सांगीतिक प्रस्तुतिसहित भजनकीर्तन कार्यक्रम सञ्चालन गरिएको थियो। मादल, बाँसुरीलगायतका बाजाको धुनमा सहभागीहरूले भक्तिमय भजन गाउँदै नाच्दा कार्यक्रमस्थल भक्तिमय बनेको थियो।
परिवार तथा बालबालिकासमेत सहभागी कार्यक्रममा नेपाली धार्मिक तथा सांस्कृतिक परम्परालाई निरन्तरता दिने प्रयास गरिएको थियो। कार्यक्रमको अन्त्यमा उपस्थित सम्पूर्ण भक्तजनलाई प्रसाद वितरण गरिएको थियो।
MaNa Mangfold Nepal Norge का अनुसार प्रवासी नेपाली समुदायबीच आपसी भाइचारा, सद्भाव र एकता अभिवृद्धि गर्नुका साथै नेपाली संस्कृति तथा आध्यात्मिक परम्पराको संरक्षण र प्रवर्द्धन गर्ने उद्देश्यले कार्यक्रम आयोजना गरिएको हो।
आयोजकले यस्ता कार्यक्रमले प्रवासमा रहेका नेपालीहरूलाई एकै ठाउँमा जोड्नुका साथै नयाँ पुस्तालाई नेपाली संस्कृति, भजनकीर्तन र आध्यात्मिक अभ्याससँग परिचित गराउन सहयोग पुग्ने विश्वास व्यक्त गरेको छ।
