🇪🇸 बार्सिलोनामा चार घण्टासम्म हिंसात्मक गतिविधि, १२८ जना पक्राउ; ७२ जना नाबालिग

स्पेनको बार्सिलोनामा झडप, आगजनी, तोडफोड र लुटपाटका घटनापछि प्रहरीले १२८ जनालाई पक्राउ गरेको छ। सामाजिक सञ्जालमार्फत भेला भएका ५०० भन्दा बढी व्यक्तिमध्ये पक्राउ पर्नेमा ७२ जना नाबालिग रहेको बताइएको छ। यो कुल पक्राउ परेकामध्ये करिब ५६ प्रतिशत हो।

घटनापछि कातालुनियाका अध्यक्ष साल्भाडोर इल्याले दोषी पहिचान गरी तोडफोड र आगजनीबाट भएको क्षतिको भरपाई जिम्मेवार व्यक्तिहरूबाट गराइने बताएका छन्।

स्पेनमा बसोबास गर्ने नेपाली समुदायलाई सतर्क रहन आग्रह

बार्सिलोनामा भएको हिंसात्मक घटनालाई ध्यानमा राख्दै स्पेनमा बसोबास गर्ने सम्पूर्ण नेपाली दाजुभाइ तथा दिदीबहिनीहरूलाई सतर्क रहन अनुरोध गरिएको छ।

सम्भावित जोखिमबाट जोगिन नेपाली समुदायले निम्न सावधानी अपनाउनु उचित हुनेछ:

झडप, दंगा, तोडफोड वा हिंसात्मक गतिविधिमा सहभागी नहुने।
झडप भइरहेको तथा जोखिमयुक्त क्षेत्रको नजिक नजाने।
स्थानीय प्रशासनको निर्देशन र सुरक्षा निकायका सूचनालाई पालना गर्ने।
आफ्नो व्यक्तिगत सुरक्षा तथा कानुनी अवस्थालाई ध्यानमा राख्दै सतर्कतापूर्वक आवतजावत गर्ने।
कुनै अप्रिय घटना देखिएमा भिडबाट टाढा रहने र आवश्यक परे प्रहरीको सहयोग लिने।

स्थानीय कानुनको पालना गर्दै शान्तिपूर्ण रूपमा बसोबास गर्ने र अनावश्यक जोखिमबाट टाढा रहने सबै नेपालीको सुरक्षाका लागि महत्त्वपूर्ण छ।

स्पेनमा रहनुभएका सम्पूर्ण नेपालीहरू सुरक्षित रहनुहोस्।

धन्यवाद।