🇫🇷 पेरिसमा नेपाली चलचित्र ‘कबड्डी ५’ को विशेष प्रदर्शन सम्पन्न

फ्रान्स। फ्रान्सको पेरिसस्थित बोबिनीमा नेपाली कथानक चलचित्र ‘कबड्डी ५’ को विशेष प्रदर्शन अक्टोबर २५, आइतबार सफलतापूर्वक सम्पन्न भएको छ।

अन्तर्राष्ट्रिय नेपाली कलाकार समाज (INAS) फ्रान्सको आयोजनामा सम्पन्न प्रदर्शनमा नेपाली चलचित्रप्रेमी तथा विभिन्न नेपाली संघसंस्थाका प्रतिनिधिहरूको सहभागिता रहेको थियो।

कार्यक्रमका लागि हल उपलब्ध गराउनुका साथै प्राविधिक व्यवस्थापनमा सहयोग पुर्‍याएकोमा INAS फ्रान्सले संस्थाका संस्थापक अध्यक्ष प्रबिन सापकोटाप्रति विशेष आभार व्यक्त गरेको छ।

अपेक्षाअनुसार दर्शकको उपस्थिति हुन नसके पनि कार्यक्रममा सहभागी दर्शक, संघसंस्थाका प्रतिनिधि, पत्रकार, सामाजिक अभियन्ता, विद्यार्थी तथा कार्यक्रम सफल बनाउन खटिएका कार्यसमिति सदस्यहरूप्रति आयोजकले धन्यवाद व्यक्त गरेको छ।

INAS फ्रान्सका अध्यक्ष महेन्द्र अधिकारीले आगामी दिनमा चलचित्र प्रदर्शनलाई अझ व्यवस्थित बनाउँदै बढीभन्दा बढी नेपाली दर्शकमाझ पुग्ने प्रतिबद्धता व्यक्त गरेका छन्।

प्रवासमा नेपाली कला, संस्कृति र चलचित्रको प्रवर्द्धन गर्दै नेपाली समुदायबीच एकता र आत्मीयता बढाउने उद्देश्यले यस्ता कार्यक्रम आयोजना गरिँदै आएको आयोजकले जनाएको छ।

#INASFrance #Kabaddi5 #NepaliCinema #NepaliCommunityInFrance