🇫🇷 फ्रान्समा नोभेम्बर १ मा प्रकाश सपुतको ‘दशैँ तिहार धमाका २०२६’ आयोजना हुँदै

पेरिस, फ्रान्स। नेपाली लोकसंगीतका लोकप्रिय गायक, अभिनेता तथा बहुप्रतिभाशाली कलाकार प्रकाश सपुतको विशेष सांगीतिक कार्यक्रम ‘दशैँ तिहार धमाका २०२६’ आगामी नोभेम्बर १, आइतबार फ्रान्समा आयोजना हुने भएको छ।

गैरआवासीय नेपाली संघ (NRNA) फ्रान्स र अन्तर्राष्ट्रिय नेपाली कलाकार समाज (INAS) फ्रान्सको संयुक्त आयोजनामा हुन लागेको कार्यक्रममा प्रकाश सपुतसहित राष्ट्रिय तथा स्थानीय कलाकारहरूको प्रस्तुति रहने आयोजकले जनाएको छ।

कार्यक्रमका लागि फ्रान्स आइपुगेका कलाकार प्रकाश सपुतलाई आयोजक संस्था NRNA फ्रान्स र INAS फ्रान्सले दुवै संस्थाका अध्यक्ष तथा पदाधिकारीहरूको उपस्थितिमा स्वागत गरिसकेका छन्।

आयोजकले फ्रान्समा क्रियाशील सम्पूर्ण नेपाली संघसंस्था, बुद्धिजीवी, व्यवसायी, विद्यार्थी, पत्रकार तथा कला र संगीतप्रेमी नेपाली समुदायलाई कार्यक्रममा सहभागी हुन हार्दिक निमन्त्रणा गरेको छ।

लोकप्रिय कलाकार प्रकाश सपुतको प्रस्तुतिले फ्रान्समा रहेका नेपालीहरूलाई नेपाली कला, संगीत र संस्कृतिसँग जोड्नुका साथै दसैँ–तिहारको उत्सवमय वातावरणलाई थप उल्लासमय बनाउने अपेक्षा गरिएको छ।

NRNA फ्रान्सका अध्यक्ष दिलीप गुरुङले सम्पूर्ण नेपाली समुदायलाई कार्यक्रममा उपस्थित भई कलाकारको हौसला बढाउन तथा कार्यक्रमलाई सफल बनाउन सहयोग गर्न आग्रह गरेका छन्।

कार्यक्रम विवरण

• कार्यक्रम: दशैँ तिहार धमाका २०२६
• मुख्य कलाकार: प्रकाश सपुत
• मिति: १ नोभेम्बर २०२६, आइतबार
• आयोजक: NRNA फ्रान्स र INAS फ्रान्स